جوزي اتجوز عليا في السر واللي حصل؟ ٢_بقلم رحاب القاضي

ام هشام بخبث قالتله ـ
طبعا لازم تكلمها، و قولها ع داليا مثلا اهي لما كانت متجوزه كانت بتشتغل وكان عندها شغاله بس كان جوزها الله يرحمه كل ما يتكلم يقول ست بـ معني الكلمه...

ـ سرح هشام في داليا وافتكر كلامها معاه وطريقتها هي فعلا زي ما قالت مامته ست بـ معني الكلمه..

ـ دخلت انا عندهم في الوقت ده وقولتلهم بصوت واطي وانا شايله تيا اللي نامت ع ايدي ...

حياه ـ
تعالو ي جماعه انا جهزتلكم الغدا، هروح انيم تيا واخد شاور لحد ما الولاد يرجعو...

قام هشام و بصلي وهو مدايق وقال ـ
طيب...

ـ ماخدتش في بالي وروحت نيمت تيا في سريرها وطلعت هدوم ليا ودخلت الحمام...

ـ بره كان هشام ومامته بيتغدو، فـ قامت ام هشام وقالت...

ام هشام ـ
انا تقريباً موبيلي جوه في اوضتك نسيته لما كنت بجيب تيا..

قام هشام وقالها بسرعه وقال ـ
طيب اقعدي ي ماما انا هدخل اجيبه ليكي..

ردت عليه بسرعه وقالت ـ
لا كمل اكلك انت ي حبيبي وانا هدخل اجيبه..

ـ دخلت ام هشام اوضتي وطلعت من جيب بلوزتها كيس فيه تراب وفتحت الدولاب وكبت التراب فيه ع هدوم هشام وبعدين طلعت موبيلها من جيبها برضو ومسكته في ايدها وجات تخرج بس رجعت تاني عند تيا بنتي اللي كانت نايمه وشالتها فـ البنت صحيت وراحت نيمتها تاني ع سريرها وطلعت قعدت تاكل وبعد شويه بكت تيا فـ اتنهد هشام بضيق وقام وقال لـ مامته...

هشام ـ
بعد اذنك ي ماما هروح اجيب تيا لحد ما الهانم تخرج من الحمام...

مثلت ام هشام الحزن وقالت ـ
ي حول الله ي رب بقي دي عيشه ي ابني حتي اللقمه مانتاش عارف تاكولها...

هشام بسخريه ـ
معلش ي ماما..

ـ دخل هشام الاوضه لقاني طلعت من الحمام وكان شعري مبلول وشكلي فعلاً كان حلو حتي انه نسي اي زعل مني، انا مكنتش واخده بالي من نظراته ليا وافتكرته زعلان زي العاده وشيلت تيا وقولتله بسرعه..

حياه ـ
معلش ي هشام حقك عليا روح كمل اكلك انا طلعتلها اهووو...

قرب مني وقال بهدوء ـ
طيب هاتيها انا همسكهالك لحد متنشفي شعرك وتطلعي تتغدي معانا قبل ما يجو الولاد...

استغربت وسالته ـ
اي ده من امتي الحنيه دي؟..

ضحك واخد مني تيا وقال ـ
هههههههه لا ع فكره انا من يومي حنين بس انتي اللي مش واخده بالك غير من عيالك والبيت وبس..