احببت بلطجي١_بقلم الكاتبه رحاب القاضي _

انت في الصفحة 5 من 6 صفحات

ياتارا ردت عليك الست الدكتوره اللي كنت قاعدلها تحت البيت ولا سابتك وطنشتك..

اتعصب خالد وقال _
حاجه تخصني انا وهي ي حج متشغلش بالك..

حامد _
مش هشغل بالي هي كلمتك ولا لا، بس هشغل بالي بانك هتتجوزها امتي؟..

خالد _
لما ربنا يأذن ي حج حامد..

حامد _
امتي برضو، اخواتك البنات اللي اصغر منك اتجوزو وبقي كل وحده معاها بدل العيل تلاته، صحابك كلهم اتجوزو وخلفو واخوك يوسف اللي اصغر منك بعشر سنين بندورله ع عروسه وهنجوزو قريب، انت بقي اي اللي يخليك. تقعد اكتر من كده وانت بقي عندك 33 سنه، ولا الهانم لسه مرضيتش عليك..

قرب خالد منه وقاله بهدوء _
لما نور توافق وتخلص جامعتها هتجوزها، انما افرض نفسي عليها واخليها تعيش معايا وهي مش موافقه مش هيحصل...

حامد بسخريه _
وهي ليها عين ترفض بعد مبقيت تصرف عليها وع اهلها وع ابوها العيان، ده حتي هدومها انت بتجيبهالها وبتصرف عليها شقاك وهي فالكليه اهو وحده غيرها تتمنالك الرضا ترضي مش تتفرعن عليك..

اتعصب خالد وقاله_بص ي حج انا سيبتك تتحكم فكل حاجه تخصني زمان من اول مخلتني اطلع من الاعداديه ومكملش تعليمي واشتغل معاك فالموقف والعطاره وانك بعد. ما امي اتوفت اتجوزت ووجيبت مراتك وبنتها واجبرتني اعيش معاهم فبيت واحد، لحد مخلتني اتخانق وابقي شاب مشبوه وبيخوف عشان ابقي الكبير بعدك وانا قولتلك حاضر ي اباا وسكت، بس عند نور مش هسكت الا دي دي روح ابنك فيها ي حج حامد واللي بيني وبينها محدش ليه دعوه بيه..

مشي من قدام حامد وهو بيقول بهدوء _
تصبح ع خير ي حج..

طلعت مرات ابوه اللي كانت بتسمع كلامهم من ورا باب اوضتها..

وقالت لحامد بخبث _
احلق شعر راسي ان مكانت سحراله البت دي..

حامد _
خلينا قاعدين اما نشوف اخرتها مع الست الكتوره دي..

ــــــــــــــــــــــــــــــــــــــــ

_تاني يوم الصبح، صحي خالد ع صوت موبيله وهو بيرن..

فرد وهو نايم_
اي ي نور..

نور _
انا رايحه الجامعه سلام..

ادايق وقالها _
الناس بتقول صباح الخير الاول ي ست الدكتوره..

نور_
مش فاضيه افضل اتكلم هتاخر ع محاضراتي..

اتعصب خالد _
اتعدلي ي نور ع الصبح وطظ فاي محاضرات لو متكلمتيش زي مانا عايز..

ادايقت نور وقالتله وكانت فعلا هتبكي _
هو انا اتكلمت ازاي ولا هو اي زعيق فيا وخلاص..