هو انا وحشه _اومال خطيبي سابني ليه؟ كااامله

يا استاذ يا استاذ ممكن اسألك سؤال 
اتفضلي يا انسة 
هو انا وحشة .....شكلي وحش مثلا ...لبسي وحش 
لا انتي زي القمر 
اومال ليه خطيبي سابني واتجوز صاحبتي 
عشان خطيبك غبي وخاېن واعمي 
يعني الغلط مش فيا انا صح 
لا طبعا مش فيكي وانتي اكيد هتلاقي اللي يقدرك ويحبك
ما انا لقيته خلاص 
طب الحمدلله 
تحب تتجوزيني !!
افندم قلتي ايه !
بقولك تحب تتجوزني ايه اطرش ولا مبتفهمش عربي 
لا ده انتي اللي شكلك مچنونة عشان توقفي واحد غريب في الشارع وتطلبي منه يتجوزك ...انتي مچنونة يا انسة !

طيب اسالك سؤال هو انا وحشة ...شكلي وحش 
لا طبعا انتي زي القمر 
اومال ليه مش عايز تتجوزني
يا انسة انا معرفكيش ازاي اتجوزك !!
عايز تعرف ايه عني طيب ...اسمي ..انا اسمي يقين ..
سني انا عندي ستة وعشرين سنة ..مؤهلاتي انا متخرجة من كلية طب بيطري ...بابايا غني وامي سيدة أعمال وانا عاطلة عن العمل...وزي ما انت شايف اني زي القمر ...بعرف اطبخ واغسل وجاهزة للجواز ...يعني عروسة كاملة من 
مجاميعه 
لا ده انا ابقي حمار لو وقفت معاكي ثانية واحدة 
استني بس اسمعني ....يا استاذ اسمعني بس 
نعم ..عايزة ايه تاني 
عايزة اتجوزك 
لا حول ولا قوة الا بالله يا بنتي استهدي بالله مش كده هو انتي واقعة للدرجادي...انا عارف اني وسيم وبجذب البنات ...بس مش كده اتقلي شوية .
وسيم ايه ينيلك ده انت شبه البغل
البغل !ما تحسني الفاظك انا اصلا غلطان اني واقف اكلمك .
طب استني انا هفهمك ...انا عايزاك تخطبني كده تمثيلية يعني عشان اغيظ خطيبي. 
مش فاهم.
يعني يا ذكي تيجي معايا فرح خطيبي النهاردة علي أساس انك خطيبي 
لا انتي لاسعة وانا اللي غلطان عشان واقف معاكي كل ده وسايب شغلي 
هديك الفين جنية وتيجي معايا هو يوم واحد بس وخلاص 
انا ماشي 
خليهم تلاتة 
خليهم عشرة وانا اقوله اني جوزك مش خطيبك 
موافقة 
علي بركة الله ...بس انتي زي القمر النهاردة 
حبيبي ربنا يكرمك 
لا بجد انتي قمر وانا محظوظ اني هرتبط بواحدة زيك 
ايوة كده اشتغل معايا يا حمو 
مع اني اسمي يوسف بس نخليها حمو لأجل عينيكي يا جميل ...الا قوليلي فرح خطيبك امتي وفين 
النهاردة وأديني رقمك عشان ابعتلك العنوان في رسالة 
بعد ما اخدت رقمه واتفقنا علي كل حاجة روحت البيت ...ولقيت ماما بتقولي 
كنتي فين يا اخر صبري 
زغرطي يا سعاد 
خير يا بت 
انا اتجوزت 
يالهووووووي
يتبع الجزء التاني شكرا لتفاعلكم السكر زيكم 
مالك بس يا سعاد ...ده انتي مفروض تزغرطي 
ازغرط ...ده هخلي اللي ما يشتري يتفرج عليكي يا غلطة عمري 
مسكت شعري وقالت 
جواز ايه يا بت انطقي انتي ناوية تموتيني ناقصة عمر !
اهدي يا فوزية هتموتيني!!يا بابا الحقني 
جه بابا وقال بخضة 
فيه ايه يا سعاد مالك 
تعالي يا اخويا شوف بنتك المچنونة بتقول انها اتجوزت !
بصلي بابا پصدمة
هو بصراحة مش بالضبط ...سعاد مكبرة الموضوع شوية ....انا لسه هتجوز يدوب